भडगांव : भीषण धडक! वडजीसह पंचक्रोशीत शोककळा…
सत्यार्थ न्यूस रिपोटर चेतन सरोदे /प्रभाकर सरोदे
भरधाव बस कारवर आदळली : आईसह दोन्ही मुलांचा मृत्यू, बालक गंभीर . नांदगाव नजीक छत्रपती संभाजीनगर रस्त्यावर समोरून येणाऱ्या बसने जोरदार धडक दिल्याने झालेल्या भीषण अपघातात एकाच कुटुंबातील तिघांचा मृत्यू झाल्याची दुर्देवी घटना घडली आहे. आईसह भाऊ-बहिण या अपघातात मृत्यूमुखी पडले या अपघातात तीन वर्षीय मुलगा मात्र बचावला असुन त्याची प्रकृतीही चिंताजनक आहे. जळगाव जिल्ह्यातील भडगाव तालुक्यातील वडजी येथे राहणारे भाजीपाला व्यावसायिक विश्वनाथ फकिरा पाटील या भावाच्या घराच्या वास्तुशांतीसाठी नाशिक येथील रहिवासी असलेले वंदना संतोष नरवाडे (वय ४०), शुभम संतोष नरवाडे (वय २०), निकिता मनोज शिंदे (वय २२) आणि तीन वर्षीय बालक नाशिकहून भडगावकडील वडजी या गावी कार (क्र. एमएच/ १५/सीडी/२०५७) ने आज दिनांक १४ मे मंगळवार रोजी सकाळी येण्यासाठी निघाले होते. सकाळी ११ वाजेच्या सुमारास नांदगाव-संभाजीनगर रस्त्यावर गंगाधरी गावाजवळील हॉटेल तेजस नजिक समोरील एका वाहनाला ओव्हरटेक करणारी चाळीसगाव -मनमाड बस (एमएच./१४/ बी.टी/ ४४९८) नरवाडे यांच्या कारवर आदळली. या भीषण अपघातात कारमधील तिघांचा जागीच मृत्यू झाला तर तीन वर्षीय बालक गंभीर जखमी आहे. त्यास मालेगाव येथील रुग्णालयात दाखल करण्यात आले असून त्याचीही प्रकृती गंभीर चिंताजनक आहे. हा अपघात इतका भीषण होता की अपघातात कारचा चक्काचूर झाला. अपघातात वंदनाताई यांचा मुलगा संतोष आणि मोठी मुलगी निकिता यांचा मृत्यू झाला. एकाच कुटूंबातील तिघांवर काळाने झडप घातल्याने या घटनेमुळे सर्वत्र हळहळ व्यक्त केली जात आहे. भडगांव तालुक्यातील वडजी गावासह भडगांव तालुक्यात शोककळा पसरली आहे. घटनेची माहिती मिळताच पोलिसांनी घटनास्थळी धाव घेतली असून पुढील तपास सुरू आहे.
Leave a Reply